ISH ritar þann 30. nóvember 2020

Kæru bræður, þegar allt stúku­starf var lagt niður þann 11. mars fyrr á þessu ári, held ég að fáir hafi gert sér grein fyrir því að COVID-19 ástandið yrði jafn langt ferli og það stefnir í að verða. Starfið hófst engu að síður með Stórhá­tíð­ar­fundi þann 6. ágúst, eða mun fyrr en þekkt er frá liðnum árum í starfi innan R. Fundarhöld stóðu þó stutt yfir, hófust að nýju í byrjun september en stöðv­uðust fljótt aftur. Nú er ljóst að engir fundir, né fjölda­sam­komur verða á þessu ári – jafnvel ekki í byrjun næsta árs heldur. Ég hef því beðið vefnefnd um að stöðva birtingu á starfsskrá um óákveðinn tíma.

Á meðan ekki sér fyrir endann á takmörkunum eða afléttingu þeirra, verðum við engu að síður að halda lífsbar­áttunni áfram. Bræðurnir hafa tekið hvatningu Stórmeistara R. af jákvæðni og sýnt í verki að þeir vilja og geta haldið sambandi við hvern annan og breytt samkvæmt áherslum R. um dyggðir Frímúrara, þó ekki sé um formlega stúkufundi að ræða. Alltaf er þó unnt að gera betur og ég sé ekki annað en að fjölmargir brr. vinni áfram hörðum og hröðum höndum að ýmsum verkefnum sem efla tengsl milli þeirra og fjölskyldna þeirra. 

Okkur er það nefnilega mjög mikils virði að allir bræður, ungir sem aldnir, nýliðar í starfinu sem þeir lengra komnu, viðhaldi og efli tengslin sín á milli þrátt fyrir óværuna sem enn ógnar samfélagi okkar. Af þeim sökum hvet ég bræður til að bjóða nú systrunum og fjölskyldu­með­limum sínum til að hlýða saman og horfa á það efni sem stúkurnar hafa verið að senda frá sér á innri hluta heima­síð­unnar okkar. Þar er að finna fjölbreytilegt og áhugavert efni sem höfðar til bræðra og fjölskyldna þeirra.

Aðventukaffi ekkna frímúr­ara­bræðra sem áralöng hefð er komin á að halda í Reglu­heim­ilinu í Reykjavík, verður því miður ekki mögulegt að boða til í desember, en bræðra­nefnd Mímis sem hefur leitt undir­bún­inginn að þessu sinni mun stýra útsendingu jólagjafa til ekknanna. Það er þrekvirki því ekkjur látinna bræðra eru tæplega 500! Ég er þess fullviss að öll hjálp við það er vel þegin.

Því miður verður heldur ekki mögulegt að halda neinar jólatrés­skemmtanir milli jóla og nýárs! Það er okkur auðvitað ekki síður erfitt að sætta okkur við, en augljóst að enginn gerir athuga­semdir við að verði felldar niður. 

Við gleðjumst yfir því að stjórn Frímúr­ara­sjóðsins hefur nýlega samþykkt að gefa veglega styrki til nokkurra samtaka í velferð­ar­þjónustu og verður þeim gjöfum gerð betri skil í Frímúr­aranum og á innri hluta heima­síð­unnar fljótlega. Frímúr­ara­sjóð­urinn ef byggður upp af beinum framlögum bræðra og þó hann sé ekki mjög stór sjóður hefur hann á liðnum árum sinnt mjög merki­legum verkefnum með veglegum styrk­veit­ingum. Þökk sé ykkur kæru bræður.

Bræður mínir, ég óska ykkur gleði­legrar aðventu, förum varlega í samskiptum okkar við aðra, við erum öll Almanna­varnir, hugum að sjúkum og þeim sem eiga um sárt að binda vegna efnahags og eða annarra aðstæðna. Lítið bros, örstutt símtal, örstutt tölvu­skeyti, jafnvel stutt SMS, gerir mikið fyrir þann sem gefur sér tíma til slíks og örugglega mikið fyrir þann sem þiggur. 

Eiríkur Finnur Greipsson
Erindreki Reglunnar.