Starfsemi innan Frímúrarareglunnar tímabundin stöðvuð — Uppfært 24. febrúar 2021 Sjá nánar.

Áramóta­kveðja Stm. Ásgeirs Magnús­sonar

„Nú árið er liðið í aldanna skaut..."

Bræður mínir. Gleðilegt ár og takk fyrir gömlu árin.

Árið sem er að líða er um margt óvenjulegt, ár sem við viljum líklega flestir gleyma sem fyrst en við horfum með jákvæðni og bjartsýni til komandi ára og að við getum komið saman í húsinu okkar að Ljósatröð sem fyrst á þessu nýja ári.

Hvenær það verður er erfitt að segja, en við munum allavega setja upp okkar sameinginlega Þorrafund á netinu þriðju­daginn 19. janúar næstkomandi, nánar um það þegar nær dregur og dagskrá liggur fyrir. Í ár verður Hamar með fundinn, en Njörður með þorra­erindi sem ræðumeistarar okkar flytja okkur.

Bræður mínir ég hvet ykkur til að hlúa að hver öðrum og fjölskyldum ykkar, förum varlega og njótum stund­ar­innar.

Nú árið er liðið í aldanna skaut
og aldrei það kemur til baka,
nú gengin er sérhver þess gleði og þraut,
það gjörvallt er runnið á eilífðar braut,
en minning þess víst skal þó vaka.

En hvers er að minnast? Og hvað er það þá,
sem helst skal í minningu geyma?
Nú allt er á fljúgandi ferð liðið hjá,
það flestallt er horfið í gleymsk­unnar sjá.
En miskunnsemd Guðs má ei gleyma.

Hún birtist á vori sem vermandi sól,
sem vöxtur í sumarsins blíðum,
í næðingum haustsins sem skjöldur og skjól,
sem skínandi himinn og gleðirík jól
í vetrarins helkulda­hríðum.

Hún birtist og reynist sem bless­un­arlind
á blíðunnar sólfagra degi,
hún birtist sem lækning við böli og synd,
hún birtist þó skærast sem frels­arans mynd,
er lýsir oss lífsins á vegi.

Nú Guði sé lof fyrir gleðilegt ár
og góðar og frjósamar tíðir,
og Guði sé lof, því að grædd urðu sár,
og Guði sé lof, því að dögg urðu tár.
Allt breyttist í blessun um síðir.

Ó, gef þú oss, Drottinn, enn gleðilegt ár
og góðar og blessaðar tíðir.
Gef himneska dögg gegnum harmanna tár,
gef himneskan frið fyrir lausn­arans sár
og eilífan unað um síðir.

                        Valdimar Briem (1848 – 1930)

Með bróður­legri kveðju
Ásgeir Magnússon
Stm. Njarðar.

Eldra efni

Innskráning

Hver er mín R.kt.?