Þakklátur, glaður og stoltur

Pistill stofn­anda Fjölnis

Grétar Óskarsson

Stúkan okkar Fjölnir var stofnuð 27. janúar 1987. Þáverandi SMR, Gunnar J. Möller, hafði falið br. Vali Valssyni að stofna nýja St. Jóh. stúku sem yrði sú fimmta í Reykjavík.

Það voru liðin 12 ár frá stofnun síðustu St. Jóh. stúku í höfuð­borginni og þörf var fleiri stúkna þar sem fjölgun félaga í Reglunni var mikil og aðsókn fór vaxandi. Br. Valur Valsson brást ekki því trausti sem honum var sýnt með útnefningu hans til þessa verkefnis og mikið starf var framundan. Leiddi hann það starf skipulega og með þeirri staðfestu sem nauðsynleg var. Undir­bún­ingur stofnunar stúkunnar var umfang­smikill og eitt af mikil­vægustu verk­efnunum var val stofn­félaga og þá sérstaklega verðandi embætt­is­manna, sem einkum komu að undir­bún­ings­starfinu. Ég varð þakklátur, glaður og stoltur þegar br. Valur bauð mér að gerast stofn­félagi og taldi ég það bæði mikinn heiður og áskorun til mín sjálfs að bæta sjálfan mig og verða betri reglu­bróðir.

Upptaka mín í Regluna fór fram í stúkunni Mími í október 1969 og hafði ég þegar hér var komið sögu hlotið IX° og var embætt­is­maður Stórstúk­unnar en jafnfram ritari Stúkuráðs. Var því ekki um það að ræða að ég yrði embættis­maður í Fjölni, en starf mitt fyrir Stúkuráð gaf mér þó tækifæri að leggja nokkuð af mörkum til undir­búnings stofnunar stúkunnar okkar.

Á þessum tíma var almenn tölvu­notkun í landinu rétt að ganga í garð og Stjórn­stofa Reglunnar hafði ekki enn verið tölvuvædd sem slík. Stúkuráð hafði því ekki enn fengið tölvur til að útbúa og endurnýja ritúöl fyrir hinar ýmsu stúkur og öll ritúöl voru vélrituð með gamla laginu. Nú var komið að því að nýja stúkan okkar Fjölnir þyrfti ritúöl, öll ritúöl I°, II° og III°, en þau voru ekki til nema sem ljósrit og vélrituð afrit eldri ritúala annarra stúkna. Það var mitt hlutverk sem Ritara Stúkuráðs að útbúa þessi ritúöl fyrir Fjölni.

Flugmála­stjórn hafði tekið í notkun tölvur á skrif­stofum sínum nokkru áður og þar á meðal hafði ég fengið einka­tölvu með ritvinnslu­kerfinu Word. Lá því beint við fyrir mig sem Ritara Stúkuráðs að endurrita þau ritúöl Reglunnar sem til þurfti í ritvinnslu­kerfi tölvunnar og þar með hafði Stúkuráð fengið fyrstu ritúöl Jóhann­es­arstiganna komin á stafrænt form.

Fjölnir var því fyrsta stúkan sem fékk nýútgefin, endur­skoðuð og endur­rituð ritúöl þegar hún tók til starfa. Þau voru framlag mitt við undir­búning að stofnun Fjölnis fyrir nær því 28 árum síðan. Síðar fengu einnig aðrar stúkur endur­nýjuð og bætt ritúöl í stafrænu formi, fyrst Jóhann­es­arstigin en síðar Andrés­arstigin og loks Stórstúkan, sem nú heitir Lands­stúka Frímúr­ar­a­regl­unnar á Íslandi.

Við stofn­fé­lagar Fjölnis litum svo á það sem okkar sérstöku ljúfu skyldu að mæta sérlega vel og reglulega á stúkufundum og taka þátt í stúku­starfinu af heilum hug. Hvað mig varðar gegndi ég þeirri skyldu eins samvisku­samlega og mér var unnt, þar til ég var árið 1995 kallaður til starfa í hinum „ytra heimi“, í fyllstu merkingu þeirra orða, því að ég fór til starfa í Namibíu og var flugmála­stjóri í því góða landi næstu 5 árin. Þar á eftir lá leiðin til Kanada og síðan til Kosovo, Bútan og Serbíu.

Árin erlendis urðu alls tólf en Fjölnir hélt áfram að vaxa og dafna þótt mín nyti ekki lengur við! Nú hef ég aftur á móti tækifærið til þess að taka upp þráðinn á ný, endurnýja kynnin við stúku­bræður og rækja stúku­starfið af kostgæfni. Megi svo verða.

Grétar H. Óskarsson   X — nr. 11

Innskráning

Hver er mín R.kt.?