Tækifæri

Pistill stofn­anda Fjölnis

Kristján S. Sigmundsson — Fjölnir

Síminn hringdi hjá mér um haustið 1986 og erindið var, hvort ég hefði áhuga á að gerast stofn­félagi í nýrri St. Jóhannesar stúku sem til stæði að stofna í janúar 1987. Ég man ég svaraði strax „já“ það væri mér mikill heiður. Ég hafði verið í Reglunni í 5 ár, kominn á IV/V stig og var tilbúinn að takast á við nýja hluti.

En hverjir voru þessir nýju hlutir? Ég hafði heyrt hjá mér reyndari bræðrum, að það að taka þátt í stofnun nýrrar stúku væru ákveðin forréttindi sem sérhver bróðir ætti að nýta sér, ef honum byðist það. Með þessu símtali buðust mér því ákveðin forréttindi og mig langaði að nýta mér þetta tækifæri.

Mikil spenna ríkti fyrir stofnfund stúkunnar þann 25. janúar 1987, og hlaut hún nafnið Fjölnir. Einvalalið aðalemb­ætt­is­manna stóð að stofn­uninni og var ég svo heppinn að vera boðið að gerast aðstoð­ar­maður siðameistara strax í byrjun.

Strax var ljóst að mikill metnaður var lagður
í alla hluti, hvort heldur sem var embætt­is­færsla eða samheldni bræðra­hópsins. Stofn­endur voru 39 og eðli málsins samkvæmt var það eðlileg krafa að menn mættu á nánast alla fundi stúkunnar fyrstu árin.

Eitt af því sem mér er minnis­stætt frá þessum fyrstu árum var hve mikill metnaður var hjá stjórn­endum stúkunnar um að öll framkvæmd stúkufunda væri lýtalaus. Eins og svo oft er sagt „að eftir höfðinu dansa limirnir“. Þá tók enginn bróðir að sér embætti í Fjölni án þess að leggja allan sinn metnað í þau verkefni sem honum voru falin.

Menn æfðu sig ómælt og vildu sanna sig og sýna að þeir hefðu verið þess verðugir að hafa verið valdir í þennan hóp. Því er ekki að leyna að með því að taka þátt í stofnun stúku með aðeins 39 bræðrum verður samband og nánd bræðra miklu meiri en gerist í stærri stúkum. Þarna birtist bræðra­lagið í allri sinni mynd.

Það sem ég er ánægð­astur með í starfi Fjölnis í gegnum tíðina í þessi nærri 27 ár er hversu metnað­urinn hefur ávallt verið til staðar og gaman að sjá hversu gildin sem stofn­end­urnir lögðu upp með í byrjun hafa haldið sér í aga og metnaði fyrir því að gera hlutina vel.

Kristján S. Sigmundsson   R&K — FHR — nr. 31

Innskráning

Hver er mín R.kt.?