Upplýsingar og takmarkanir á starfsemi Reglunnar vegna COVID — 31. ágúst 2021 Sjá nánar.

Hvað er sóttkví?

Byrjum á því að skoða þetta samsetta orð, sótt-kví. „Sótt“ er gamalt orð sem gefur til kynna tiltekin veikindi, sérstaklega smitandi sýking­ar­sjúkdóm sem getur borist milli manna (farsótt). Orðið „kví“ er einnig gamalt og var lengi vel notað í sveitum um afgirt svæði eða sérstaka rétt þar sem kindur voru mjólkaðar. Maður gæti því hugsað sér að „sóttkví“ sé tiltekinn staður eða sérútbúin aðstaða, svo sem húsnæði, en svo er ekki endilega. 

„Sóttkví“ er miklu fremur ráðstöfun eða framkvæmd, til dæmis heyrum við nú að sóttvarnateymi ráðleggi eða fyrir­skipi einstak­lingum að fara í sóttkví, ekki á neinn sérstaklega útbúinn stað heldur að breyta hegðun sinni, víkja til hliðar í samfé­laginu, takmarka ferðir sínar, hætta umgengni við annað ósmitað fólk, sinna sérstökum smitvörnum og persónulegu hreinlæti á dvalar­staðnum og fylgjast með hugsan­legum sjúkdóms­ein­kennum. Ráðstöfunin er gerð vegna þess að umræddir einstak­lingar hafa verið í nánd við smitaða eða veika einstak­linga, gætu þannig hafa smitast af varasömum sýkli (veiru eða bakteríu) og þar með verið orðnir  „smitberar“. Þetta á yfirleitt aðeins við um einstak­linga sem enn eru einkenna­lausir og ekki veikir. 

Margvís­legar sóttvarna- og hrein­læt­is­reglur geta fylgt þessari ráðstöfun, „að fara í sóttkví“. Þær eru of margar til að fjalla um hér og nú og þar að auki gilda mismun­andir reglur um sérstakar undir­teg­undir af sóttkví, svo sem „heima­sóttkví“, „vinnu­sóttkví“ og „úrvinnslu­sóttkví“. 

Rétt finnst mér að lokum að taka fram að sú ráðstöfun, sem á við um veika einstak­linga og þá sem eru með einkenni alvarlegs, smitandi sýking­ar­sjúkdóms, er nefnd „einangrun“, en henni fylgja mun strangari reglur um aðskilnað frá öðru fólki og sérstaklega um allt það sem „ekki má“. (Myndin er fengin að láni af vefnum)

Innskráning

Hver er mín R.kt.?