Öll starfsemi innan Frímúrarareglunnar tímabundin stöðvuð — Uppfært 7. nóvember Sjá nánar.

Skilaboð frá SMR

Starfið hefst í næstu viku

Kæru bræður.

Við göngum nú í gegnum erfiða tíma og fordæma­lausa í alþjóða­sam­fé­laginu. COVID-19 farald­urinn setur okkur í þá stöðu að allt okkar Reglu­starf er í uppnámi eins og önnur samskipti fólks. Íslensk yfirvöld hafa borið gæfu til að halda áhrifum farsótt­ar­innar í lágmarki, með takmörkunum á samskiptum okkar í samfé­laginu. Frímúr­ar­a­reglan á Íslandi fer að sjálf­sögðu sem ætíð fyrr í einu og öllu að íslenskum lögum og reglum og félags­starf okkar tekur mið af þeim lögum og reglum sem hér gilda hverju sinni.

Öllu Reglu­starfi var aflýst þann 11. mars síðast­liðinn og hófst ekki að nýju fyrr en þann 6. ágúst með Stórhátíð eins og kunnugt er. Kröfur um sóttvarnir eru í stöðugri endur­nýjun og leiða því til þess að við þurfum í sífellu að endur­skoða okkar möguleika á hefðbundnu stúku­starfi. Ekki sér enn fyrir endan á kröfum um strangar sóttvarnir.

Eins og staðan er í dag, þá er reiknað með að GÞ fundurinn verði fimmtu­daginn 3. september, en eins og bræðurnir vita, þá markar sá fundur ætíð upphaf almenns stúku­starfs að hausti hverju sinni. Vegna þeirra takmarkana sem í gildi eru vegna sóttvarna, þá vinna Stólmeistarar Jóhannesar- og Andrés­ar­stúknanna að tillögum að því með hvaða hætti við getum hafið okkar starf að nýju í kjölfar GÞ fundarins, allt innan þeirra reglna sem í gildi eru og verða. Tilkynn­ingar um framhald starfa sem og allar breyt­ingar verða kynntar á heimasíðu R. svo fljótt sem verða má hverju sinni.

Von mín er að innan fárra daga liggi fyrir tillögur um með hvaða hætti við getum hafið störf, einnig að við finnum og virkjum leiðir til að nálgast þá bræður sem ekki eiga möguleika á að vera í nánum samskiptum við aðra. Það er ákaflega mikilvægt að sú mannrækt sem við stundum hér verði áfram iðkuð af bræðrunum með eða án hefðbundinna stúku­starfa. Þar vil ég sérstaklega nefna heimsóknir í bókasöfnin í Reglu­heim­ilinu og stúku­húsunum tólf á landinu öllu.

Bræður mínir. Saman munum við sigrast á þessum erfið­leikum og við eigum að nýta reynsluna af þeirri baráttu til vaxtar og eflingar okkar einstaka félags­skapar, sem hefur það fallega markmið að göfga og bæta mannlífið. Að efla góðvild og drengskap með öllum mönnum og auka bróðurþel þeirra á meðal. Þegar við höfum sigrast á óværunni komum við til starfa af eldmóði og bróðurhug.

Reykjavík 28. ágúst 2020
Kristján Þórðarson SMR

Aðrar fréttir

Fræðsla í Covid
Sálin og samfélagið
Jakobsvegurinn
Umhyggjuverkefnin eru víða

Innskráning

Hver er mín R.kt.?