Aflétting sóttvarna í starfi stúkna

24. febrúar 2022

Heilbrigð­is­ráðu­neytið hefur tilkynnt að frá og með föstu­deginum 25. febrúar verði öllum opinberum sóttvarna­að­gerðum vegna heims­far­aldurs COVID-19 aflétt. Þar með falla brott allar reglur um takmarkanir á samkomum og skóla­haldi og einnig krafa um einangrun þeirra sem sýkjast af COVID-19. Heilbrigð­is­ráð­herra kynnti ákvörðun sína og sagði m.a:

„Við getum sannarlega glaðst á þessum tímamótum en ég hvet fólk engu að síður til að fara varlega, gæta að persónu­bundnum sóttvörnum og halda sig til hlés finni það fyrir einkennum.“

Í minnis­blaði sóttvarna­læknis kemur fram að daglega hafa greinst á milli 2.100 og 2.800 smit en alvarleg veikindi hafa aftur á móti ekki aukist að sama skapi. Útbreidd smit valdi þó miklu álagi á stofnunum. Inniliggjandi sjúklingum sem greinast með COVID-19 hefur fjölgað, sama máli gegnir um íbúa á hjúkr­un­ar­heimilum og veikindi og fjarvistir starfs­fólks vegna COVID-19 hafa falið í sér miklar áskoranir við að halda úti óskertri starfsemi.

Að mati sóttvarna­læknis er víðtækt samfé­lagslegt ónæmi gegn COVID-19 helsta leiðin út úr faraldrinum, eða allt að 80%. Til að ná því þurfi sem flestir að smitast af veirunni þar sem bóluefnin dugi ekki til, þótt þau veiti góða vernd gegn alvar­legum veikindum.

Aflétt­ingar

Í ljósi þessara varnað­arorða er það niður­staða SMR og Viðbragð­steymis R. að okkur beri að fara áfram varlega í öllum samskiptum okkar, fundar­höldum og samveru­stundum. Niður­staða teymisins er því að gefa út eftir­farandi tilkynningu:

  1. Forskráninga á fundi er ekki lengur krafist, enda krafa um fjölda­tak­markanir ekki lengur til staðar.
  2. Ekki er lengur krafa um eins metra fjarlægð­armörk og grímu­notkun verður valkvæð.
  3. Eindregin tilmæli eru til bræðra um að gæta áfram vel að eigin sóttvörnum og taka tillit til óska annarra bræðra sem vilja gæta varúðar og sóttvarna. Meðal annars með því að forðast snert­ingar og hópamyndun.
  4. Nánari fyrirmæli til Stmm. og Smm. verða send í rafpósti á morgun, þar sem útfærslur fundarsiða verða tíundaðar nánar. Ástæðan er sú að við teljum mjög mikilvægt að takmarka smithættu áfram, þó með umtals­verðum aflétt­ingum.

Kæru bræður, auðvitað fögnum við því að fá meira frelsi í samskiptum okkar við annað fólk. Höfum það samt hugfast að öllu frelsi fylgir ábyrgð. Mjög margir í okkar hópi eru komnir á efri ár og með undir­liggjandi sjúkdóma. Það er ekki skemmtileg tilhugsun að hópsmit komi upp okkar á meðal og því rík ástæða til að ganga hægt um gleðinnar dyr.

Kristján Þórðarson SMR
og Viðbragð­steymi R.

Aðrar fréttir

Innskráning

Hver er mín R.kt.?